स्वातंत्र्यवीर सावरकर हे एक अलौकिक व्यक्तिमत्त्व. सशस्त्र क्रांतिकारकांचे ते प्रेरणास्थान ठरले. देशाच्या राजकारणात मार्गदर्शक ठरले. पूर्वापार चालत आलेल्या रुढी, परंपरा, अंधश्रद्धा, अस्पृश्यता यांच्या विरोधात त्यांनी आवाज उठवला. आधुनिकीकरण, वैज्ञानिक दृष्टीकोन, सैनिकीकरणाचा पुरस्कार केला. आजही पचवायला कठीण वाटणाऱ्या विचारांचं संचित त्यांनी आपल्याला दिलं. समाज प्रबोधनासाठी नाटकं लिहिली, लावण्या लिहिल्या, पोवाडे-फटके लिहिले. या साऱ्याची सुरुवात झाली ती अगदी लहानपणीच.

स्वातंत्र्यवीर विनायक दामोदर सावरकर यांचा जन्म २८ मे १८८३ ला नाशिक जवळच्या भगूर येथे झाला. वडील दामोदरपंत आणि आई राधाबाई. वीर विनायकाचे जेष्ठ बंधू गणेश दामोदर अर्थात बाबाराव सावरकर, बहीण मैनाबाई, धाकटे बंधू नारायण दामोदर अर्थात बाळ सावरकर. आई राधाबाई लवकर वारल्यामुळे दामोदरपंतांनीच आपल्या मुलांचा सांभाळ केला.